ቃል ሃገራዊ ማሕበር ደቂ-ኣንስትዮ ኤርትራ ብምኽንያት 8 መጋቢት ኣህጉራዊ መዓልቲ ደቂ-ኣንስትዮ

ኣህጉራዊ መዓልቲ ደቂ-ኣንስትዮ – 8 መጋቢት “ኤርትራዊት ጓል-ኣንስተይቲ፡ ዋሕስ ልኡላውነትን ልምዓትን!” ኣብ ትሕቲ ዝብል ቴማ፡ ከም ወትሩ ብኽብ ዝበለ ድምቀት ተዘኪራ ትውዕል ኣላ።

ናይ ሎሚ ዘበን 8 መጋቢት፡ ዕብየትና ንምሕንኳል ዘንቀዱ ማእለያ ዘይነበሮም ተጻብኦታት – ብልዑል ሃገራዊ ንቕሓትን መኸተን ኣረብሪብና፡ መሰረታዊ ልምዓት ኣብ ምውዳድ ቀሊል ዘይኮነ ገስጋሰ ብምምዝጋብ፡ ናብ ሓድሽ ምዕራፍ ኣብ እንሰግረሉ መድረኽ መቐይሮ እያ ትበዓል ዘላ። ናይ’ዚ ሓድሽ ምዕራፍ ተልእኾና ድማ፡ ኣብ ኩሉ መዳያት ዝተዋህለለ ገስጋስ ብምዕቃብ፡ ዝበረኸ ዕብየት ምርግጋጽ እዩ። እቲ ኣብ ዝሓለፈ መድረኻት ተኣምር ዝሰርሐ ድሙቕ ኣበርክቶ ኤርትራዊት ጓል-ኣንስተይቲ፡ ሎሚ’ውን ከም ትማሊ ኣብ ምዕዋት ዝቕጽል ሃገራዊ መደባት ልምዓት ግደኡ ወሳኒ እዩ።

ከም ዝፍለጥ፡ ዕዙዝ ሱታፌ ደቂ- ኣንስትዮ ኤርትራ ኣብ እዋን ሓርነታዊ ቃልሲ ኮነ ኣብ ዕማም ህንጸት ሃገር፡ ዋሕስ ልዑላውነትን ልምዓትን ምዃኑ ብግብሪን ብተደጋጋምን ኣመስኪሩ እዩ። እዚ ግብራዊ ስራሕ’ዚ ድማ፡ ንኣመለኻኽታ ዜጋታት ብመሰረቱ ቀይሩ፡ ህዝቢ ኤርትራ ኣብ ሕቶ ጾታዊ ማዕርነት ንብዙሕ ድሕረታት ዝሰገረ ሕብረተሰብ ክኸውን ኣብቂዕዎ ኣሎ።

ብተወሳኺ ደቂ-ኣንስትዮ ኤርትራ፡ ምዕሩያት ኣበርከትቲ ጥራይ ዘይኮነ፡ ምዕሩያት ረባሕቲ ንክኾና ብዝተፈጥረ ዕድላት፡ ህይወት ኤርትራውያን ደቂ- ኣንስትዮ ብዓይነቱ እናተለወጠ ክመጽእ ጸኒሑ ኣሎ። ካብ’ቲ ብዙሕ ለውጥታት ገለ ጉሉሓት መርኣያታት ንምጥቃስ፡ ኣብ 1991 መጠን ሞት ኣዴታት ኣብ ግዜ ወሊድ 998 ዝነበረ፡ ኣብ’ዚ እዋን’ዚ ናብ ትሕቲ 325 ወሪዱ ኣሎ። ከም ክሽቦ፡ ትሕቲ ዕድመ መርዓን ካልእን ዝኣመሰለ ጎዳእቲ ልምድታት ንምውጋድ ዝተኻየደ ቃልሲ፡ ሕጋውን ኮማውን ድርኺት ስለ ዝረኸበ፡ ኣዝዩ ዘተባብዕ ውጽኢት ኣመዝጊቡ እዩ። ኣብ ትምህርቲ ተኸፊቱ ብዘሎ ምዕሩይ ዕድላት፡ ሱታፌ ደቂ- ኣንስትዮ ኣብ ካልኣይ ደረጃ ትምህርቲ ልዕሊ 34.3%፡ ኣብ ኮለጃት ድማ ብገምጋም ልዕሊ 37.1% ምብጽሑ፡ ንብሩህ መጻኢ ዕድል ኤርትራውያን ደቂ-ኣንስትዮ ዘእምት እዩ። ሱታፈ መንእሰያት ደቂ- ኣንስትዮ ኣብ ዝተፈላለየ ሞያታት፡ እንተላይ ኣብቲ ንደቂ-ተባዕትዮ ጥራይ ተሓዚኡ ዝነበረ ዕዮታት እውን ርኡይ ለውጢ ኣምጺኡ እዩ። ኣብ ርእሲ’ዚ ደቂ-ኣንስትዮ ኤርትራ ድኽነት ንምውጋድን ቁጠባዊ ዕብየት ንምርግጋጽን ኣብ ዝግበር ዘሎ መደባት ልምዓት ዘለወን ሱታፌን ተራን ዕዙዝ ኢዩ።